在火車站買了個鮮果批, 再加個巨型波羅包做早餐, 都幾好食架.
今日是星期日, 台南火車站前有88號, 99號兩架免費巴士, 可以去齊大部份台南的主要景點.
我們在下午一時左右登上99號巴士, 希望去我們的目的地: 安平古堡.
點知上咗車, 巴士緩緩地去晒所有台南景點: 孔廟......赤崁樓......億載金城.......行咗個幾鐘頭: 大哥, 幾時先去到安平呀.
結果去到安平, 已經是下午兩點幾!
也好, 令我們避過了最熱的時間: 凡事要向好嗰邊唸嘛.
安平一帶, 除了安平古堡外, 附近的延平街都好有趣. 這裡是台灣有名的老街, 窄窄的街巷裡有很多有趣的小舖.
全條街最旺的, 首推呢間賣柑仔蜜餞的林永泰興蜜餞. 創業於1886年, 用古法醃製, 幾乎所有買蜜餞的遊客都幫襯佢, 收錢收到唔停得手, 而旁邊其他賣蜜餞的舖頭, 都只有托住頭無神無氣等運到.
咁受歡迎, 梗係有原因, 於是我都幫襯吓. 但點解無杏脯呢? 事事但但買咗包梅, 均一價NT$50一包.
話咁快又肚餓啦, 我地去咗一間叫做伯龍驛亭的餐館, 點了蝦仁煎, 蜆仔湯, 蝦蜷, 鼎邊剉(類似海鮮焿)等台南美食, 都做得不錯.
但點解我地點咗杯南瓜冰仲未到?
於是問一問老闆娘.
點知老闆娘黑口黑面, 彈咗一句: "你們現在就要吃嗎" , 眉目之間, 似乎暗嘲我地兩個大鄉里, 咩都唔識喺度嘈生晒, 邊有人一邊吃熱食一邊食冰架.
於是南瓜冰即到: 原來我地真係大鄉里! 南瓜冰原來唔係一杯飲品, 係一大碟冰, 大碟到夠兩個人食!
本來老闆娘無禮的態度, 令我們憤憤不平, 點知一食個南瓜冰, 真係好食到無話可說! 啲冰綿到不會咬到冰粒, 幼細到入口即溶, 加上牛奶和南瓜蓉, 真係我一生人之中, 食過最好食嘅甜品之一! 我不得不講: 老闆娘, 你好嘢!
食過飽, 到附近的安平開台天后宮, 以及安平古堡參觀, 入場費NT$50.
安平古堡是1624年荷蘭人佔領台灣所建的要塞, 後來日本人統治台灣, 國民黨時期都屢有加建.
行上古堡塔頂, 令我想起, 四月去德國柏林行上個勝利女神塔.....
參觀完安平古堡, 再去附近的安平樹屋參觀, 入場費也是NT$50.
安平樹屋本來是戰前英資德記洋行的貨倉, 後來荒廢了, 纏滿了榕樹氣根, 這樣也成為了旅遊景點.
遊罷, 又坐99號免費車離開安平, 再轉的士去花園夜市.
花園夜市可說是台灣南部最大的夜市, 比高雄的六合夜市還要大, 有約400個攤販, 卻只在星期四, 六, 日才營業.
我們當然食到唔停口: 芝心豬扒, 串燒, 臭豆腐, 愛玉冰, 珍珠奶茶, 麻辣串串香..............好味呀.....
而全場最旺的, 是一檔叫 "二師兄" 的台式鹵味: 長期圍著幾十個顧客, 要千辛萬苦先逼到入去, 啲店員做到唔停手應接不暇, 有啲發掹憎地叫著 "你們一個一個來................"
我們當然唔會放過, 於是一買三包: 一包鹵蛋, 一包豆腐干, 一包雞翼, 買番酒店食.
買完坐的士去火車站: 個的士司機又食煙又唔開冷氣, 真係想臭死同熱死我哋.
登上自強號列車返高雄: 今日都好充實哇!
發表文章
沒有留言:
張貼留言