skip to main |
skip to sidebar
博多的夏天, 朝早五點幾太陽已經非常猛烈, 如果今天留在這裡, 一定熱到唔想出街, 好彩今天只有半天, 上晝shoppping完就可以上機, 晚上就回到香港了! 
我們在博多站附近閒逛, 但店舖的選擇不多, 超級市場的價格也較貴.
無所謂啦, 我們買了一些おみやげ(土產), 拉麵, 茶葉, 食物, 傘子之類. 最後在旅館附近的ampm便利店買了一箱杯麵.
11點幾, 坐地鐵轉免費接駁巴士去機場. 去到發現, 機場大部份貨品不單唔會貴過市區, 而且仲免稅, 即係仲抵過市區! 於是又買過! 
原本飛機1400起飛, 點知delay到三點, 問問原因, 職員說上海機場撞機, 嚇死我了!
還有很多時間: 好在福岡機場有無線上網.
3點起飛, 4點到上海. 東方航空行政混亂, 年輕的職員噤若寒蟬, 然而有個年幾大的女職員, 勞勞氣氣, 火氣十足, 發脾氣閙同事, 佢叫我地企埋一邊等轉機等咗幾十分鐘, 心唸咁嘅服務態度都有嘅, 佢似乎還覺得這叫做能幹.
最激氣係, 架機明明大把位, 佢卻編我地分開坐, 這些服務真是一點也不體貼.
五點幾起飛, 七點三到香港, 想去免稅店買酒, 點知仲貴過唔免稅, 那麼免稅有什麼意義呢?
在行李帶攞行李, 發覺啲行李被弄到污污糟糟, 唉~!! 真係....... Mm...
九天行程完了, 下次再去過!
早上八時零幾分, 從熊本坐 "有明八號" 列車到福岡, 再轉普通列車到門司港.
在福岡轉普通慢車到門司港, 已過了下午十一點.
門司港在百多年前是一個重要港口, 到現在還保留了很多歐式建築物. 就算拆了舊的建築物都唔會拆晒, 總留返一些遺跡, 連火車站個洗手間都係古跡, 都有型過人, 人地就識營造浪漫氣氛, 香港官員真係要嚟學嘢. 
我們先坐渡輪到對岸的本州下關市(390YEN), 5分鐘就到, 猶如中環過尖沙咀. 第一件事, 就是去唐戶市場食嘢. 我們點了河豚湯(350YEN), 炸河豚(100YEN一條), 炸河豚餅(100YEN一個), 炸鯨魚(500YEN一PACK), 河豚刺身(1000YEN左右), 海胆壽司, 蝦壽司, 拖羅壽司, 不知名的魚壽司等(300YEN一件), 食到好飽. 食完才知道, 兩點幾開始減價, 有啲減到半價; 早知遲啲食啦. 
下關以前是一個重要商港, 舊名叫馬關. 1895年中國在甲午戰爭打敗了, 就是在馬關簽約, 割讓台灣. 我們在唐戶市場食完, 過對面馬路參觀前英國領事館, 秋田商館, 有班太太在前英國領事館開畫展, 知道我們是香港人, 露出驚異的神情. 
再直行約十分鐘左右, 有一條小路叫李鴻章道. 李鴻章道的盡頭, 有一座建築物叫春帆樓, 就是李鴻章簽降約的地方: 以前是吃刺身的地方, 但二次大戰時被炸掉了, 現在重建成酒店, 但仍沿用春帆樓的名字.
春帆樓的旁邊, 就是日清簽和約的紀念館. 現時還保留了當時簽和約的桌椅, 李鴻章, 李經方兩父子, 秘書伍廷芳, 日本首相伊藤博文坐的位置. 當時李鴻章在下關被日本狂徒刺殺, 差點性命不保, 但也因此令日本被國際指責, 才沒有向中國有更多利益需索.
再行二百米, 在門司大橋下面, 有一個古戰場, 當地政府安排了一個大嬸向遊客講古仔. 古戰場附近, 有一條秘密通道: 原來是一條海底隧道, 可以由下關步行到對岸的門司港. 隧道內有些燈轉用了紫外光燈, 令天花板出現螢光的星星效果, 增加了趣味. 
今天的天氣, 一時好曬, 一時好大雨. 我們在門司港的觀潮遊步道散步了一會, 就下起雨來, 只有走去避雨.
到雨停了, 我們回到門司港周圍參觀, 同時有一團永安團在附近. 
最令人期待的是和門司港香蕉人合照, 也許因為天雨, 沒有太多人要影相, 可以大影特影. 
接近六時, 坐車經小倉回福岡. 本來下午打算去長崎, 現在沒時間了.
在福岡博多站的東橫INN安頓好, 晚上出去吃 "燒肉"(日式燒烤), 點知食到滿頭大汗.
因為之前睇過個BLOG, 話博多站附近有間"多牛"好抵食, 極力推薦, 於是我地試下去搵, 果然比我地搵到, 雖然位置偏遠, 仍有好多人等位, 足証在當地有些名氣, 我地都等咗超過一個鐘先有位.
一坐低, 佢地就放低咗個大炭爐, 我覺得真係好熱, 而且生熟食物共用一對木筷子, 真係有啲不衛生, 但見到周圍的日本人都毫無投訴地吃得好開心, 也許這就是文化差異吧.
餐牌上可以點的肉類, 都給我們點了: 雞肉, 香腸, 牛腸, 牛背, 豬拖羅, 牛脂肪(我都不知是牛那一部份, 只覺像一團脂肪).....吃了六碟, 三杯飲品, 3500YEN. 雖然幾好食, 但係未飽, 還是走了, 事關比煙燻到勁流眼水, 又熱到成身汗.
坐08:07的九州橫斷特急列車離開大分, 開往阿蘇.
在阿蘇火車站遇見一大班韓國人 + 一大班台灣人 + 一小撮香港人, 吵吵鬧鬧, 好嘈耶~~~
在阿蘇火車站坐巴士到阿蘇西站 (540yen), 再轉登山纜車(來回1000yen)上山.
真掃興, 由於台灣打風, 外圍雨帶影響九州, 阿蘇也下起雨來, 視野模糊, 寄生火山 "米塚" 也沒法看見, 殘念!
正感無奈之際, 一陣大風吹來, 竟將雨雲稍為吹散, 視野隨即清晰起來, 原來因為大雨收檔的小販也重新營業. 我們買了三小袋火山岩做紀念, 才300yen.
阿蘇山約高1150米, 高過大帽山, 加上下雨, 氣溫只有19.5度, 都覺得有些冷.
坐纜車回到山下, 坐巴士到草千里(140yen), 哪裡是一大片被火山礦物質滋潤了的大草原, 當地的牧民常利用這片大草原放牧牛馬. 我們剛影了兩幅相, 就立即風雲變色, 又下起雨來了. 十米以外的景色竟已完全看不見: 加上草地難行又多馬糞, 還是到紀念品店舖逛逛罷.
想回到阿蘇火車站, 可是還有幾十分鐘巴士才到, 於是想找些好吃的, 例如熊本有名的馬肉刺身, 但卻沒有開檔, 於是退而求其次飲了支阿蘇原產的牛奶(180yen).
坐巴士(470yen)回到阿蘇火車站, 特急火車早開走了, 唯有坐站站停的普通列車到熊本, 在火車內瞓完又醒醒完又瞓, 接近兩小時才到熊本.
隨即到熊本東橫inn報到, 好在地點十分方便, 一出火車站行兩分鐘即到. 房間可以望到熊本火車站, 個view唔錯.
熊本沒有地鐵, 主要的交通工具是電車仔. 我們放低行李在房間, 就坐電車仔到市中心的通筋町. 仍然下雨, 但也有好處, 熊本位處九州內陸, 天氣較熱, 今日本應熱到33度, 下雨令天氣轉涼, 最重要是不用暴曬, 周圍玩都舒服好多.
在電車上有個十分熱心的老伯, 係咁推薦我地參觀熊本城, 佢先落車, 臨走仲吩咐車上的陌生女乘客要通知我們在熊本城站落車: 老伯: 真係多謝你嘅好意呢!
熊本市中心商店街分上通和下通兩部份: 當我們到達的時候, 有樂隊在表演.
下晝五點, 我地仲未食飯, 於是在下通的松屋吃飯. 松屋是類似吉野家的低檔連所店, 勝在底食夾大件: 我叫了一客蕃茄漢堡扒套餐, 又有白飯, 麵豉湯和大碟沙律, 才 580 yen, 而且真係好飽.
行完下通, 過馬路時望見, 熊本地原來在附近的小山丘上, 於是想成全老伯心意, 上去參觀一下, 可是卻已經關門, 只有遠遠影張相作個記錄,
附近有間神社, 稱為熊本城稻荷神社, 似乎有很多當地學生在此祈求考試成功, 我們也無意地在此求了幾道幸福御守(帶在身邊的幸運小飾物).
晚上接近8點, 在下通的daiei超級市場買些東西返酒店食. 由於超市臨關門都會有大量新鮮食品廉價出售, 因此早有大批師奶來大量掃貨. 我們也不甘後人, 買了一些波羅, 蜜瓜, 西瓜, 草餅, 甜點, 麵包, 伊藤園的兩公升綠茶, 明治牛奶, 法式布甸, 還有合味道新出的辛口杯麵. 其中有幾種食物都係減價貨品, 所以只要付出1070 yen就可以食飽飽lu~
早上五時汽船返到小倉, 架船穩定到舶咗岸我地都唔知.
落船行到小倉站, 食咗個芝士咖哩杯麵, 咖哩味太濃, 蓋過了芝士味.
隨即正式使用北部九州火車証, 早上六點幾乘sonic火車到大分.
座椅設計特別, 像一雙米奇老鼠的耳仔, 還可以在車上充電.
一個多鐘頭, 0813到達大分, 只有幾分鐘時間, 又要趕上另一班0818開出的由布院號列車, 好在剛剛趕到, 差不多一上車即開.
九點幾到達湯布院市. 一朝早已經好曬.
湯布院原名由布院, 五六十年代的時候, 和隔鄰的湯原市合併, 改稱湯布院, 但火車站仍沿用由布院的名稱.
湯布院不算有很多景點, 但有很多有趣有品味的小店, 令人可以快樂地遊覽半天. 有個有趣的老伯幫人畫人像, 也不貴, 800YEN一幅, 平過大陸的街頭畫家. 他說自己以前曾在初中教美術. 我們都畫了一幅, 畫得像不像很難講, 但卻很有趣!
湯布院較漂亮的自然景色, 該包括金鱗湖: 那裡的景色有點似歐洲. 只是天氣時晴時雨, 雖則可以降溫, 但也有些麻煩.
回程的時候, 買了一片湯布院有名的B-SPEAK蛋糕(460YEN)在車上吃. 蛋糕軟綿綿, 個CREAM做得幾好.
回程的火車站站停, 慢慢到達大分. 在大分東橫INN安頓了, 卻聽到天氣報告說受颱風影響: 唔怪得落雨啦.
不理了, 放好行李就出去坐火車去到別府, 也在下雨. 我們不想去別府八地獄, 加上雨愈下愈大, 於是別府就沒什麼可觀, 還是坐火車去大分行步行街. 
在大分吃石頭鍋飯, 都幾抵食.
發表文章
