新界篇～大埔遊2009

好耐都未試過為咗周未而安排節目，今次突然心血來潮同朋友到大埔走走。嚟到大埔墟大約係早上o既十點，一出火車站向右走，便到了大埔熟食中心，LEE 度人流好多，食物o既款式亦頗多，我同朋友左揀右揀終於決定到欽記粉麵食碗有名氣o既魚蛋粉(@$17/碗)，然後到隔離o既蘇記叫返杯熱奶茶同凍OT(@$10/杯)，奶茶的味道還可以，但魚蛋粉我始終都係鍾情於香港仔山窿謝記魚旦。

雖然剛吞下一碗魚蛋粉，但為食的我，點都唔會放過食嘢o既機會呢? 難得嚟到大埔，當然要試吓有記茶粿，LEE 度的砵仔糕好有名氣架！熱辣辣的砵仔糕($4) 味道不錯，但略為甜咗D。

離開了熟食中心，我哋就嚟到大埔四里，四里係由大榮里、大光里、廣福里及大明里所組成，四條里以井字形排列，中間為休憩公園，名為大明里廣場。四里各式商舖及食肆林立，是區內居民主要的購物及消閒地點。

香港鐵路博物館係一座風格獨特o既金字頂型中國傳統建築。門樓屋脊及兩旁o既山牆上飾有蝙蝠、牡丹及喜鵲o既泥塑，寓意吉祥。博物館係由舊大埔火車站原址改建而成，一到假日就會有好多遊人到來拍照。當日，我同朋友都影咗好多相，我哋喺度留連咗差不多2小時先離開。

館內展出窄軌蒸氣火車頭、51號柴油電動機車及六輛歷史車卡。

博物館主要介紹本地鐵路交通的歷史和發展。

富善街係香港其中一個傳統巿集。LEE 度已經有過百年o既歷史，雖然係咁，但LEE 個傳統o既墟巿仍然係好熱鬧，每天商販會將貨品從門前梯級鋪陳至街道上擺賣，並且高聲叫賣。喺度感受到超巿欠缺的人情味兒！

文武廟座落於富善街，係新界首座法定古蹟。

離開富善街，朋友覺得雙腳無力，於是我哋走到附近一間涼茶舖(中和堂)飲返杯五花茶(合共$15)。

飲完涼茶，我哋去到懷仁街乘25K專線小巴去林村，一上車受到司機o既不禮貌對待，好彩落車o既時候佢都提我哋到咗林村。抵達後滿心歡喜，我同友人不停地拍攝之際，在林村o既牌坊下有一班婆婆迎面走過來，不停地叫賣佢哋手上o既寶碟，朋友話識時務者為俊傑，就幫婆婆買了10元o既寶碟，由於原本o既許願樹在休養中，友人只好把寫好o既寶碟掛上木架上。

入到林村，除了村口o既許願樹，在天后宮旁還有另一棵新o既許願樹，聽講兩棵樹o既功能唔同，可以達到大家唔同o既要求，另外由於農曆新年將至，林村仲會加多一棵塑膠造o既許願樹，希望大家願望成真啦!

在林村村口有間世紀茶餐廳，喺微風吹送下我哋突然腦裡面一片空白，在沒有煩惱o既下午，快快樂樂享用了一頓下午茶(@$22)^.^

歎完下午茶我哋乘25K專線小巴返回大埔墟，下一站大埔公園。

去到大埔公園，我哋走在回歸塔，在塔前種咗好多鮮豔奪目o既花，令我諗起之前去高雄o既花田，估唔到返嚟一陣就已經掛住台灣了!!

香港美麗o既區花，洋子荊。

喺昆蟲館玩了一個捉蝴蝶o既遊戲，跳到差D失控先可以奪得冠軍!! 好累耶~



到咗晚飯o既時間，我哋又嚟返熟食中心，去到三小姐海鮮小菜，美味的晚餐只須$244，低!!

晚飯後，我哋再到附近o既四里走走，行行吓喺業成報社見到這個狗老闆，牠o既表情真係好搞笑，引得不少遊人同牠拍照。喺四里有好多又平又靚o既水菓店，我哋各自都買咗D水菓回家。

終於到咗食甜品o既時間了，我哋選了大埔出名o既亞婆豆腐，每人一碗豆腐花，Mm... 果然好滑呀!! 可惜豆香不足，如果豆味濃D，就更好了!! 亞婆，我期待妳o既改進呀!!! 食完甜品，就結束了今日o既大埔遊喇!!